U Ljubljani nove provjere za Ligu šampiona

Rukometašice Budućnosti od četvrtka do nedjelje boraviće u Ljubljani gdje će odraditi zajedničke treninge sa Krimom, te odigrati duele protiv slovenačkog tima i Rudara u okviru trećeg turnira Regionalne lige. Nakon turnira Regionalne lige u Jagodini koji su završile sa maksimalnim učinkom i dvije pobjede, izabranicama Dragana Adžića to će biti posljednje provjere pred nastavak Lige šampiona.

U prvoj akciji u novoj godini, na drugom turniru Regionalne lige u Jagodini, ''plave'' su savladale istoimenog domaćina i ekipu Rudara, te slavile u prijateljskom meču protiv Krima.

Nove provjere očekuju ih u Ljubljani gdje su otputovale u srijedu u ranim jutranjim satima.

Za četvrtak, petak i subotu planirani su zajednički treninzi, te prijateljska utakmica sa Krimom, a u subotu (18 sati) na programu je duel protiv Rudara u okviru trećeg turnira Regionalne lige.

Boravak u glavnom gradu Slovenije, izabranice Dragana Adžića zaključiće duelom protiv Krima u nedjelju od 14.45 sati.

Glavna runda Lige šampiona startuje posljednjeg vikenda januara, a Budućnost 27. dočekuje Kopenhagen.

Rivali u grupi 1 su još ruski Rostov Don i francuski Brest.

Rostov Don ima sedam, Budućnost šest, Mec pet, Kopenhagen tri, Brest dva, a Odenze jedan bod.